<< Tudalen Blaenorol

Tudalen Nesaf >>

3

Daeth dros 200 o bobl ynghyd yng Nghanolfan y Mileniwm, Caerdydd ar gyfer noson o ddathlu ac o drafod yn y brifddinas nos Wener ddiwethaf, Ionawr 28, 2005. Soniodd y cyflwynydd Angharad Mair a'r Newyddiadurwr Guto Harri am eu gobeithion a'u dymuniadau ar gyfer y papur dyddiol cyntaf yn yr iaith Gymraeg - Y Byd - sydd yn debyg o gael ei lansio ymhen y flwyddyn.
   Bwriad y digwyddiad oedd i siaradwyr Cymraeg Caerdydd gael cyfle i ddarganfod mwy am gefndir y papur

newydd, ac yn fwy pwysig, i gefnogi'r fenter hanesyddol hon. Hefyd ar gael yn ystod y noson oedd aelodau o fwrdd Y Byd a nifer o fuddsoddwyr a chefnogwyr eraill.
   Dywedodd Ned Thomas, Cadeirydd Dyddiol Cyf, "Bydd sicrhau cefnogaeth dinas Caerdydd yn bwysig iawn o ran llwyddiant Y Byd, ac felly roedd yn galonogol dros ben cael ymateb mor bositif i'r cyflwyniad gan ffrindiau hen a newydd ar y noson.
  "Roedd Canolfan y Mileniwm yn ddewis naturiol ar gyfer y noson, gan fod yr adeilad ei hun yn ddatganiad positif o'n hunaniaeth ni fel Cymry, ac yn dangos y math o beth y gallwn ei gyflawni drwy gredu yn ein gallu ein hunain. Credaf y bydd Y Byd hefyd yn llwyddiant ac yn ddatganiad positif i Gymru, a hoffwn ddiolch i bawb sydd wedi ein cefnogi yn ein hymgyrch hyd yn hyn."
   Croesawodd aelodau o bob plaid ddyfodiad papur dyddiol Cymraeg, ac ar y noson darllenwyd neges arbennig gan Brif Weinidog Cymru, Rhodri Morgan yn dymuno'r gorau ar gyfer digwyddiad llwyddiannus."
   Roedd Dr Gwynfor Evans, yntau yn un o fuddsoddwyr y papur, wedi anfon  neges arbennig o gefnogaeth : "Rwy'n dymuno'n dda iawn i'r Byd, y papur newydd dyddiol Cymraeg. Bydd yn llanw bwlch mawr ym mywyd y genedl, ac yn cryfhau ei hunan-barch. Daliwch ati yn y gwaith o ddod a'r Byd i Gymru, a Chymru i'r byd."

Datgelwyd cynlluniau heddiw (Dydd Mawrth 22 Chwefror 2005) ar gyfer Eisteddfod Genedlaethol Urdd Gobaith Cymru tra gwahanol i'r arfer, i'w chynnal ym Mae Caerdydd rhwng 30 Mai a 4 Mehefin eleni. Disgwylir i'r Bae cyfan gael ei drawsnewid i gynnig maes llawn bwrlwm a gweithgarwch gydol yr wythnos.
   Agorwyd y lawns yn swynol gan berfformiad o ddarn cerddorol gwreiddiol gan ddisgyblion o Ysgol Gyfun Bro Morgannwg. Rhoddodd Dirprwy Arglwydd Faer Cyngor Caerdydd, y Cynghorydd Delme Bowen, a Gweinidog Llywodraeth Cynulliad Cymru dros Ddiwylliant, Y Gymraeg a Chwaraeon, Alun Pugh, eu cefnogaeth i'r Eisteddfod, a'i chroesawu'n wresog i'r brifddinas. 
   Yn ôl y Cynghorydd Delme Bowen: "Mae'n bleser gennym groesawu'r Eisteddfod yr Urdd yn ôl i Gaerdydd yn ystod y flwyddyn arbennig hon, wrth i ni ddathlu ein canmlwyddiant fel dinas a hanner can mlynedd fel prifddinas Cymru. Mae'r Eisteddfod yn rhan allweddol o'n rhaglen ddiwylliannol yn 2005 ac yn ffordd berffaith i bobl ifanc ar draws y wlad ddathlu gyda ni."
   Dywedodd Alun Pugh, "Mae'r Urdd yn chwarae rôl pwysig i gynyddu defnydd o'r Iaith Gymraeg ynghyd â dathlu diwylliant Cymru. Dwi'n hapus iawn y bydd yr Urdd a'r Cynulliad Cenedlaethol yn cydweithio ar nifer o ddigwyddiadau yn ystod yr Eisteddfod - mae'n bwysig nad yw pobl ifanc yn gweld y Cynulliad fel sefydliad anghysbell, ond yn hytrach fel rhywbeth perthnasol i'w bywydau bob dydd.
   Dwi'n dymuno'n dda i bawb sy'n cymryd rhan yn Eisteddfod eleni, ac dwi'n edrych ymlaen i'w croesawu nhw yma i Gaerdydd ym mis Mai"

Mae Eisteddfod Genedlaethol yr Urdd yn gyfle bob blwyddyn i ddathlu'r gorau o dalent ieuenctid Cymru, ac eleni caiff miloedd o'n disgyblion a myfyrwyr y cyfle i berfformio ar brif lwyfan Canolfan Mileniwm Cymru - Theatr Donald Gordon. Ac yn ogystal â'r cystadlu yng Nghanolfan y Mileniwm ei hunan, bydd rhaglen lawn o sioeau, cyngherddau, drama, dawns, cerddoriaeth roc, arddangosfeydd celf, gweithgareddau gwyddoniaeth, hyfforddiant chwaraeon dwr, wal ddringo a channoedd o stondinau eraill o gwmpas y Bae, i gynnig diwrnod i'r brenin i'r teulu oll!
   Meddai Siân Eirian, Cyfarwyddwr yr Eisteddfod a'r Celfyddydau: "Dros y blynyddoedd diwethaf, mae'r Eisteddfod wedi tyfu a datblygu'n barhaol, gan arbrofi ac arloesi mewn nifer o ffyrdd. Bydd eleni'n gyfle gwych i roi cynnig ar fformat hollol wahanol. Mae ardal y Bae yn ddelfrydol, gyda Chanolfan y Mileniwm fel canolbwynt. Rydan ni'n gobeithio denu mwy o ymwelwyr nag erioed o'r blaen i brofi bwrlwm yr Urdd".
   Erbyn heddiw, mae Eisteddfod yr Urdd, a gychwynodd dros 80 mlynedd yn ôl, yn wyl gelfyddydol ieuenctid fwyaf Ewrop, yn denu dros 40,000 o gystadleuwyr o 8 i 25 oed yn yr eisteddfodau cylch a sir, gyda dros 15,000 yn mynd ymlaen i gystadlu yn ystod yr wythnos ei hunan.
   Mae Gwersyll yr Urdd Caerdydd yn un o'r cwmniau preswyl yng Nghanolfan y Mileniwm, gyda chyfleusterau i 150 i aros, ac yn cynnig cyfleoedd i ysgolion i drefnu gwyliau yn y brifddinas a gweithdai celfyddydau creadigol/perfformio i blant a phobl ifanc dros Gymru gyfan. 

<< Tudalen Blaenorol

Tudalen Nesaf >>