<< Tudalen Blaenorol

Tudalen Nesaf >>

Y DINESYDD   RHAGFYR 2004

3

'Paprika' - Bwyty Newydd yn y Bae


Er ei bod yn noson oer o Dachwedd mentrodd llawer o Gymry Cymraeg Caerdydd i noson agoriadol swyddogol ty bwyta newydd 'Paprika' yn Stryd Bute, Bae Caerdydd.  Roedd tua 60 o bobl wedi cael y fraint o gael gwahoddiad gan berchnogion 'Paprika', y Cynghorydd Mohammed Sarul Islam a'i bartner busnes, Faiz Belal.
   Roedd y fwydlen yn cynnig amrywiaeth eang - o gig oen i samosa llysieuol a chyri blodfresych.  Roedd pob dim yn flasus iawn ac yn tynnu dwr i'n dannedd!   Yn wir, aeth llawer yn ôl am ail blataid!
   Profiad dymunol oerdd gweld croestoriad o bobl o gymaint o wahanol gefndiroedd yn bwyta ac yn cael hwyl yng nghwmni Dirprwy Arglwydd Faer Caerdydd, y Cynghorydd Delme Bowen, a agorodd y noson drwy dorri'r ruban a chroesawu ty bwyta 'Paprika' yn rhan o fywyd cymdeithasol Caerdydd.
   Mae 'Paprika' mewn lleoliad delfrydol yn agos i Ganolfan y Mileniwm - yn addas iawn am bryd blasus cyn neu wedi sioe.  Gallaf eich sicrhau y cewch groeso cynnes gan y perchnogion a chyfle i flasu yr holl ddanteithion y mae 'Paprika' yn eu gynnig. Iechyd da!     Siân Couch

O'r chwith: Mohammed Sarul Islam, Delme Bowen a Faiz Belal

Llongyfarchiadau

Llongyfarchiadau i Sara Gwilym, Caerdydd a Rhys Thomas, Caerffili ar eu dyweddïad. Mae Sara yn ferch i Carys Williams a'r diweddar Barchedig Meurwyn Williams, a Rhys yn fab i Eyron a Denise Thomas, Penpedairheol.

Llongyfarchiadau i Lisa Gwyneth a Jonathan Richard Saunders o Fferm Ty Canol, Caerffili ar enedigaeth Samuel Richard, brawd bach i Tomos John.

Llongyfarchiadau i Siôn Young ar ennill Pencampwriaeth Tennis Bwrdd i

Siôn Young

Ddynion yng Nghlwb David Lloyd yn ddiweddar.  Mae Siôn yn ddisgybl ym Mlwyddyn 11 yn Ysgol Gyfun Glantaf.

Llongyfarchiadau i Margaret a Gwynne Evans, Y Rhâth, ar enedigaeth eu hwyres Gwyneth Gregory, plentyn cyntaf i Angharad a James, a chyfnither i Rhys, Elis, Betsan, Elian, Awen, Aeron, Megan a Cai. Ganed Gwyneth yn Vancouver ar Dachwedd 18fed.

Staff Manwerthu
Siop Portmeirion, Canolfan Mileniwm Cymru
Canolfan Mileniwm Cymru ym Mae Caerdydd yw'r digwyddiad celfyddydol mwyaf cyffrous yn Ewrop heddiw. Nid yn unig mae'n ganolfan i opera, balé, dawns a sioeau cerdd, bydd hefyd yn rhoi cartref o dan yr un to i saith sefydliad celfyddydol Cymreig gan gynnwys yr Academi a'r Urdd.
Mae cwmni Siopau Portmeirion Cyf. yn gweithredu prif uned fanwerthu'r ganolfan.
Gwahoddir ceisiadau am swyddi Staff Manwerthu llawn amser a rhan amser ar gyfer yr uned hon. Rydym yn chwilio am bobl frwdfrydig sydd â diddordeb yn y celfyddydau. Byddai profiad blaenorol yn fantais, ynghyd â sgiliau dwyieithog yn y Gymraeg a'r Saesneg. Rydym yn cynnig graddfa o £6 yr awr ynghyd â phecyn da o fuddiannau staff.
Cysylltwch â Gareth Evans, Rheolwr Personél, Portmeirion, Gwynedd LL48 6ET ar ebost gareth@swyddfa.co.uk neu ffoniwch Swyddfa'r Siopau ar 01766-770774.

GORSEDD Y WLADFA'N ANRHYDEDDU GWILYM


Llongyfarchiadau cynnes i Gwilym Roberts, Rhiwbeina, ar gael ei wneud yn aelod o'r Orsedd yn Eisteddfod Chubut, Patagonia, yn ddiweddar. Gwyddom oll am gyfraniad nodedig Gwilym i feithrin cysylltiadau â'r Wladfa. Yn yr un seremoni yn y Gaiman anrhydeddwyd Maelor Jones a Sonia Evans, ewythr a modryb Veronica Paola Jones de Kiff, Parc y Rhath.

Yn eisiau.
Dyn neu fenyw ifanc i weithio fel au pair gyda theulu Cymraeg yn Llundain.
Byw mewn.  Dechrau mis Ionawr.   Ffoniwch 0208 876 6751 am fanylion

<< Tudalen Blaenorol

Tudalen Nesaf >>